‘O crisceto

Chjanu chjanu
s’affunnavane
‘e mmane ‘nt’ ‘a farina
s’avutava e se ggirava,
chesta seta avvellutata,
sotto e ‘ncoppe
cu passione,
dint’ ‘a martura ‘e lignamme
‘na pasta ‘e pane
azzeccosa e prufumata
cresceva
comme cresce ‘ nu criaturo…

Quanne appena
‘o juorno era schiarato,
s’appicciava ‘a lampa ‘e fuoco
dint’ ‘o furno
mmiezz’ ‘o luogo,
quanne ‘o ppane
era abbuffato
s’appujava ‘ncopp’ ‘a preta
ca cuceva
al punto ggiusto!

Ah…
Ch’ addore se spanneva
dint’ a ll’aria
tutt’ attuorno….

Dint’ a ll’ultima mezz’ora
se ‘nfurnava
pure ‘o ruoto ‘e ramme
‘e pizza ‘e pummarola,
‘a sartenia
cu ‘e ppatane,
‘nu tortano cunnite
cu ‘e ccicule seccate
e ddoie ove fresche
d’ ‘e ggalline
‘nt’ ‘o ciardino
s’ appuiavane
‘ncopp” ‘a trezza
d’ ‘a zizzenella
cu ‘o pepe
e ‘a ‘nzogna ‘e puorco.

Ah…..ch’ addore…..
stu prufumo
te facev’ ascevuli’!

Mo’ dint’ a ll’aria
se sente ll’addore
dello smog!

‘A chiammane
accussi
‘sta puzza ‘e …..niente!

‘O cchju’ bbrutto
e’ ‘ o fummo nire
comme ‘a morte,
ca cummoglia
chillu bbello cielo blu’!

‘O fummo d’ ‘a munnezza
ca s’ appiccia
‘nt’ a ‘sti terre ‘e paravise….

Chest’
oggi trase dint’ ‘e case!

Tutto tuossevo e veleno!

Inedita, Maria Grazia Zagaria.
05/marzo/2017.